ಭಾರತ-ಇಂಗ್ಲೆಂಡ್ ಮುಕ್ತ ವಾಣಿಜ್ಯ ಒಪ್ಪಂದ: ಗುಡ್ಡ ಅಗೆದು ‘ಮೌಸ್’ ಹಿಡಿದ ಕಥೆ!

2022ರ ಜನವರಿಯಲ್ಲಿ ಆರಂಭಗೊಂಡು, ಅದೇ ವರ್ಷದ ದೀಪಾವಳಿಯ ಕೊಡುಗೆ ಆಗಿ ಸಿಗಬೇಕಿದ್ದ ಭಾರತ-ಬ್ರಿಟನ್ ಮುಕ್ತ ವಾಣಿಜ್ಯ ಒಪ್ಪಂದವು (Free Trade Agreement), ಪೈಪ್‌ಲೈನಿನಲ್ಲಿ ಅಟಕಾಯಿಸಿಕೊಂಡು, ಆ ಬಳಿಕ ಬೋರಿಸ್ ಜಾನ್ಸನ್, ಲಿಝ್ ಟ್ರಸ್, ರಿಷಿ ಸುನಾಕ್ ಮತ್ತು ಈಗ ಕೀರ್ ಸ್ಟಾರ್ಮರ್ ಎಂಬ ನಾಲ್ವರು ಬ್ರಿಟಿಷ್ ಪ್ರಧಾನಮಂತ್ರಿಗಳನ್ನು ಕಂಡು, ಅಂತೂ ಇಂತೂ ಕೊನೆಗೆ ಈ ವರ್ಷ ಮೇ 6ರಂದು ಅಂತಿಮಗೊಂಡಿದೆ. ಕೊಡುಗೆಯೇನೋ ಮೂರು ವರ್ಷ ವಿಳಂಬವಾಗಿ ಸಿಕ್ಕಿದೆ. ಆದರೆ ಈ ಕೊಡುಗೆ ನಿಜಕ್ಕೂ ಸಿಕ್ಕಿದ್ದು ಯಾರಿಗೆ? ಎಂಬ ಪ್ರಶ್ನೆಯನ್ನು ಇಟ್ಟುಕೊಂಡು ಹುಡುಕಾಟ ನಡೆಸಿದರೆ, ಬಹಳ ಕುತೂಹಲಕರ ಸಂಗತಿಗಳು ಕಾಣಿಸಿಕೊಳ್ಳುತ್ತಿವೆ.

ಜಗತ್ತಿನ ಐದನೇ ಮತ್ತು ಆರನೇ ಅತಿದೊಡ್ಡ ಇಕಾನಮಿಗಳ ನಡುವಣ ಈ ವಾಣಿಜ್ಯ ಒಪ್ಪಂದವನ್ನು ಭಾರತವು ‘huge win’ ಎಂದು ಹೇಳಿಕೊಂಡಿದ್ದರೆ, ಬ್ರಿಟನ್ ‘big prize of Brexit’ ಎಂದು ಕರೆದುಕೊಂಡಿದೆ. ಭಾರತದ ವಾಣಿಜ್ಯ ಸಚಿವ ಪಿಯೂಷ್ ಗೋಯಲ್ ಅವರು ಈ ಒಪ್ಪಂದದಿಂದ ಭಾರತದ ರೈತರು, ಮೀನುಗಾರರು, ಕಾರ್ಮಿಕರು, ಎಂಎಸ್‌ಎಂಇ, ಸ್ಟಾರ್ಟಪ್ ಹಾಗೂ ಸಂಶೋಧನಾ ಕ್ಷೇತ್ರಗಳಿಗೆ ಅನುಕೂಲಕರವಾಗಲಿದ್ದು, ನಾವು ಜಾಗತಿಕ ಆರ್ಥಿಕ ಶಕ್ತಿಕೇಂದ್ರ ಆಗುವತ್ತ ಮತ್ತಷ್ಟು ಹೆಜ್ಜೆ ಮುಂದಿಟ್ಟಿದ್ದೇವೆ. 2030ರ ಹೊತ್ತಿಗೆ ಭಾರತ-ಇಂಗ್ಲೆಂಡ್ ದ್ವಿಪಕ್ಷೀಯ ವಾಣಿಜ್ಯ ವ್ಯವಹಾರಗಳು 6,000 ಕೋಟಿ ಡಾಲರ್‌ಗಳಷ್ಟಾಗಲಿವೆ ಎಂದು ವರ್ಣಿಸಿದ್ದರು. (PIB Release ID: 2127321) ಬ್ರಿಟಿಷ್ ವಿದೇಶಾಂಗ ಕಾರ್ಯದರ್ಶಿ ಜೊನಾಥನ್ ರೆನಾಲ್ಡ್ಸ್ ಅವರು ಕೂಡ ಈ ಒಪ್ಪಂದಕ್ಕೆ ಹರ್ಷ ವ್ಯಕ್ತಪಡಿಸಿದ್ದಾರೆ. ಬ್ರಿಟಿಷ್ ಅಧಿಕಾರಿಗಳು, ಈ ಒಪ್ಪಂದದಿಂದ ತಮ್ಮ ವಾಣಿಜ್ಯ ವ್ಯವಹಾರಗಳು ಶೇ. 40 ಏರಿಕೆ ಕಾಣಲಿವೆ. ಭಾರತದ ಜೊತೆ ವ್ಯಾಪಾರದ ಕಾರಣದಿಂದಾಗಿ, ನಾವು ಟಾರಿಫ್ ಮೂಲಕ ತೆರಬೇಕಾಗಿದ್ದ 480 ಕೋಟಿ ಪೌಂಡ್ ಹಣ ಪ್ರತೀ ವರ್ಷ ಉಳಿಯಲಿದೆ; ಭಾರತದ ಜೊತೆ ನಮ್ಮ ವ್ಯಾಪಾರಗಳು ಶೀಘ್ರವೇ 4,240 ಕೋಟಿ ಪೌಂಡ್‌ಗೆ ಏರಿಕೆ ಕಾಣಲಿವೆ ಎಂದಿದ್ದಾರೆ.

ಭಾರತಕ್ಕೇನು ಲಾಭ?

ಶೇ. 99 ಸರಕು-ಸೇವೆಗಳ ಮೇಲೆ ಟಾರಿಫ್ ಇಲ್ಲದಾಗಲಿದೆ; ಜವಳಿ, ಸಾಗರೋತ್ಪನ್ನಗಳು, ಚರ್ಮ, ಕ್ರೀಡೋಪಕರಣಗಳು, ಆಟಿಕೆಗಳು, ಆಭರಣಗಳು, ಇಂಜಿನಿಯರಿಂಗ್ ಸರಕು, ಕಾರುಗಳು, ವಾಹನ ಬಿಡಿ ಭಾಗಗಳು, ಇಂಜಿನ್‌ಗಳು, ಸಾವಯವ ರಾಸಾಯನಿಕಗಳ ಇಂಗ್ಲೆಂಡ್ ಮಾರುಕಟ್ಟೆಯಲ್ಲಿ ಭಾರತ ಇನ್ನಷ್ಟು ಸ್ಪರ್ಧಾತ್ಮಕಗೊಳ್ಳುವುದು ಸಾಧ್ಯವಿದೆ.

ಇಂಗ್ಲೆಂಡ್‌ನ ಗ್ಲೋಬಲ್ ಬ್ಯುಸಿನೆಸ್ ಮೊಬಿಲಿಟಿ ವೀಸಾದ ಅಡಿಯಲ್ಲಿ ಇಲ್ಲಿಯ ತನಕ 15 ಉದ್ಯೋಗಗಳಿಗೆ ಭಾರತೀಯ ವೃತ್ತಿಪರರಿಗೆ ಪ್ರವೇಶ ಇತ್ತು. ಈಗ ಅದನ್ನು 33 ಉದ್ಯೋಗಗಳಿಗೆ ವಿಸ್ತರಿಸಲಾಗಿದೆ. ಹಾಗಾಗಿ, ಐಟಿ, ಹಣಕಾಸು, ಶಿಕ್ಷಣ ಇನ್ನಿತರ ವೃತ್ತಿಪರ ಸೇವೆಗಳಲ್ಲಿ ಹೊಸ ಅವಕಾಶಗಳು ತೆರೆಯಲಿವೆ, ಭಾರತದ ಯೋಗ ಶಿಕ್ಷಕರು, ಸಂಗೀತಗಾರರು, ಅಡುಗೆಯವರಿಗೆ ಕೂಡ ಅಲ್ಲಿ ಅವಕಾಶಗಳು ತೆರೆಯಲಿವೆ.

ಸರಕು- ಸೇವೆಗಳ ಸುಗಮ ಕೊಡುಕೊಳ್ಳುವಿಕೆಗಳಿಗಾಗಿ ಹಲವು ಟಾರಿಫೇತರ ಅಡ್ಡಿಗಳೂ ನಿವಾರಣೆ ಆಗಲಿವೆ.

ಇಂಗ್ಲೆಂಡ್‌ಗೇನು ಲಾಭ?

ಅಮೆರಿಕದಲ್ಲಿ ಅಧ್ಯಕ್ಷ ಟ್ರಂಪ್ ಅವರಿಂದ ಆಟೊಮೊಬೈಲ್ ಮತ್ತು ಆಲ್ಕೋಹಾಲ್ ಉದ್ಯಮಗಳಿಗೆ ಬಿದ್ದಿರುವ ಟಾರಿಫ್ ಏಟು, ಭಾರತದ ಮೂಲಕ ಶಮನ ಆಗಲಿದೆ. ಭಾರತದಲ್ಲಿ ಬ್ರಿಟಿಷ್ ವಿಸ್ಕಿ, ಜಿನ್‌ಗಳಿಗೆ ವಿಧಿಸಲಾಗುತ್ತಿರುವ ಶೇ. 150 ಆಮದು ಸುಂಕವನ್ನು ಶೇ. 50ಕ್ಕೆ ಇಳಿಸಲಾಗುತ್ತಿದೆ. ಮಾತ್ರವಲ್ಲದೆ ಇನ್ನು ಹತ್ತು ವರ್ಷಗಳಲ್ಲಿ ಅದನ್ನು ಶೇ. 40ಕ್ಕೆ ಇಳಿಸುವ ಪ್ರಸ್ತಾವ ಇದೆ. ಇಂಗ್ಲೆಂಡ್‌ನ ಲಕ್ಸುರಿ ಕಾರುಗಳಿಗೆ ವಿಧಿಸಲಾಗುತ್ತಿರುವ ಶೇ. 110 ಆಮದು ಸುಂಕವನ್ನು ಶೇ. 10ಕ್ಕೆ ಇಳಿಸಲಾಗುತ್ತಿದೆ.

ಕಾಸ್ಮೆಟಿಕ್ಸ್, ಕುರಿ ಮಾಂಸ, ಸಾಲ್ಮನ್, ಲಘು ಪೇಯಗಳು, ಚಾಕಲೇಟು, ಬಿಸ್ಕಿಟ್, ವೈದ್ಯಕೀಯ ಪರಿಕರಗಳು, ವಿಮಾನ ಬಿಡಿಭಾಗಗಳು, ವಿದ್ಯುತ್ ಚಾಲಿತ ಯಂತ್ರಗಳು ಇತ್ಯಾದಿ, ಬ್ರಿಟನ್‌ನಿಂದ ಭಾರತಕ್ಕೆ ಹೆಚ್ಚಾಗಿ ರಫ್ತಾಗುವ ಶೇ. 90ರಷ್ಟು ಉತ್ಪನ್ನಗಳಿಗೆ ಆಮದು ಸುಂಕ ಕಡಿತ ಮಾಡಲಾಗಿದೆ.

ಭಾರತದಲ್ಲಿ ಸರಕಾರಿ ಮತ್ತಿತರ 40,000ಕ್ಕೂ ಮಿಕ್ಕಿ ಸರಬರಾಜು ಗುತ್ತಿಗೆಗಳಿಗೆ ಬಿಡ್ ಮಾಡಲು ಈಗ ಇಂಗ್ಲೆಂಡ್ ಅರ್ಹತೆ ಪಡೆಯುತ್ತದೆ. ಇದು ಇಂಗ್ಲೆಂಡಿಗೆ ವಾರ್ಷಿಕ 3,800 ಕೋಟಿ ಪೌಂಡ್ ವ್ಯವಹಾರ ತರಲಿದೆ ಎಂದು ಬ್ರಿಟಿಷ್ ವಾಣಿಜ್ಯ ತಜ್ಞರು ಅಂದಾಜಿಸಿದ್ದಾರೆ.

ಆತಂಕಗಳು ಎಲ್ಲೆಲ್ಲಿ?

ಭಾರತ-ಇಂಗ್ಲೆಂಡ್ ಎಫ್‌ಟಿಎ ಭಾರತಕ್ಕೆ ತಂದಷ್ಟು ಖುಷಿಯನ್ನು ಇಂಗ್ಲೆಂಡ್‌ಗೆ ತಂದಂತಿಲ್ಲ. ಅಲ್ಲಿನ ಪತ್ರಿಕೆಗಳಲ್ಲಿ, ರಾಜಕೀಯ ವಲಯಗಳಲ್ಲಿ ಈ ಬಗ್ಗೆ ಚರ್ಚೆಗಳು ನಡೆದಿವೆ.

ಇಂಗ್ಲೆಂಡ್‌ನ ಪ್ರಜೆಗಳಿಗೆ ಅವರ ನ್ಯಾಷನಲ್ ಇನ್ಶೂರೆನ್ಸ್ ಪ್ರೀಮಿಯಂ ಅನ್ನು ಇತ್ತೀಚೆಗೆ ಹೆಚ್ಚಿಸಲಾಗಿದೆ. ಅಲ್ಲಿ ನ್ಯಾಷನಲ್ ಇನ್ಶೂರೆನ್ಸ್ ಎಂದರೆ, ಅಲ್ಲಿನ ಉದ್ಯೋಗದಾತರು, ಉದ್ಯೋಗಿಗಳು ಮತ್ತು ಸ್ವೋದ್ಯೋಗಿಗಳು ಕಟ್ಟುವ ಈ ಮೊತ್ತವನ್ನು ದೇಶದ ಪ್ರಜೆಗಳಿಗೆ ಸರಕಾರಿ ಆರೋಗ್ಯ ಸೇವೆ (ಎನ್‌ಎಚ್‌ಎಸ್) ಸೇರಿದಂತೆ ವಿವಿಧ ಸಾಮಾಜಿಕ ಭದ್ರತಾ ಯೋಜನೆಗಳಿಗೆ ವಿನಿಯೋಗಿಸಲಾಗುತ್ತದೆ.

ಈಗ ಅಂತಿಮಗೊಂಡಿರುವ ಎಫ್‌ಟಿಎನಲ್ಲಿ, ಭಾರತೀಯ ಉದ್ಯೋಗಿಗಳಿಗೆ ಈ ಪ್ರೀಮಿಯಂನಿಂದ ಮೊದಲ ಮೂರು ವರ್ಷಗಳ ಕಾಲ ವಿನಾಯಿತಿ ಸಿಗಲಿದೆ. ಸುಮಾರು 20,000 ಭಾರತೀಯರು ಈ ತೆರಿಗೆ ವಿನಾಯಿತಿಯ ಲಾಭ ಪಡೆಯಲಿದ್ದು, ಭಾರತೀಯ ಕಂಪೆನಿಗಳಿಗೆ ಇದರಿಂದ 20 ಕೋಟಿ ಪೌಂಡ್ ವಾರ್ಷಿಕ ಲಾಭ ಸಿಗಲಿದೆ. ಈ ತೀರ್ಮಾನಕ್ಕೆ ಬ್ರಿಟಿಷ್ ಕನ್ಸರ್ವೇಟಿವ್ ಪಕ್ಷ (ವಿರೋಧ ಪಕ್ಷ) ಮತ್ತು ಖಾಸಗಿಯಾಗಿ ಲೇಬರ್ ಪಕ್ಷ (ಆಡಳಿತ ಪಕ್ಷ) ಮತ್ತು ಸಾರ್ವಜನಿಕರು ತೀವ್ರ ವಿರೋಧ ವ್ಯಕ್ತಪಡಿಸುತ್ತಿದ್ದಾರಂತೆ. ತೆರಿಗೆಯಲ್ಲಿ ತಾರತಮ್ಯ ನೀತಿ ಇದು ಎಂದು ಅವರು ಹೇಳುತ್ತಿದ್ದಾರೆ ಮಾತ್ರವಲ್ಲದೆ, ಈ ವಿಚಾರದ ಹೊಣೆ ಹೊತ್ತಿರುವ ಹೋಮ್ ಸೆಕ್ರೆಟರಿ ಉವೆಟ್ ಕೂಪರ್‌ಗೆ ಈ ಒಪ್ಪಂದದ ಸುದ್ದಿಯೇ ಗೊತ್ತಿರಲಿಲ್ಲ ಎಂಬ ಮಟ್ಟಿಗೆ ಆಪಾದನೆಗಳು ಕೇಳಿಸುತ್ತಿವೆ. ಇದರಿಂದ ಭಾರತೀಯ ‘ಸೇವಾ’ ಕಂಪೆನಿಗಳಿಗೆ ಅನುಕೂಲ ಆಗಲಿದೆ ಎಂದು ಪ್ರತಿಪಕ್ಷ ನಾಯಕ ಕೆಮಿ ಬಾಡೆನೋಕ್ ಹೇಳಿದ್ದಾರೆ. ಆದರೆ ಬ್ರಿಟಿಷ್ ಸರಕಾರ, ಹಾಗೇನಿಲ್ಲ; ಭಾರತೀಯರೂ ಆದಾಯ ತೆರಿಗೆ ಮತ್ತು ಎನ್‌ಎಚ್‌ಎಸ್ ಆರೋಗ್ಯ ಸರ್ಚಾರ್ಜ್ ಪಾವತಿಸಬೇಕಾಗುತ್ತದೆ. ಈ ರಿಯಾಯಿತಿ ಕೊಡದೆ ಇದ್ದರೆ ಭಾರತೀಯರು ಇಲ್ಲಿ ಮತ್ತು ತಮ್ಮ ತಾಯ್ನೆಲದಲ್ಲಿ ಎರಡೂ ಕಡೆ ‘ಸಾಮಾಜಿಕ ಭದ್ರತಾ ಮೊತ್ತ’ ಪಾವತಿಸಬೇಕಾಗುತ್ತದೆ. ಅವರಿಗೆ ಇದು ದುಪ್ಪಟ್ಟು ತೆರಿಗೆ ಆಗಲಿದೆ. ಬೇರೆ ದೇಶಗಳಿಗೆ ಈ ಅವಕಾಶ ಈಗಾಗಲೇ ತೆರೆಯಲಾಗಿದ್ದು, ಭಾರತಕ್ಕೆ ಇದೇನೂ ಹೊಸದಾಗಿ ಕೊಡುತ್ತಿರುವ ರಿಯಾಯಿತಿ ಅಲ್ಲ ಎಂದಿದೆ. ಭಾರತ-ಇಂಗ್ಲೆಂಡ್ ಎಫ್‌ಟಿಎ ಅಂತಿಮಗೊಳ್ಳುವಲ್ಲಿ ದೀರ್ಘಕಾಲ ಸತಾಯಿಸಿದ ಸಂಗತಿಗಳಲ್ಲಿ ಈ ಅಂಶವೂ ಒಂದು ಎಂದು ಬ್ರಿಟಿಷ್ ಮಾಧ್ಯಮಗಳಲ್ಲಿ ಕೇಳಿಬರುತ್ತಿದೆ.

ಎಫ್‌ಟಿಎ ಒಪ್ಪಂದ ಆಗಿದ್ದರೂ, ಅದರಲ್ಲಿ ಸೂಕ್ಷ್ಮ ಅಂಶಗಳ ಕುರಿತ ಒಪ್ಪಂದಗಳಿಗೆ ಇನ್ನಷ್ಟೇ ತಲುಪಬೇಕಾಗಿದೆ ಎಂಬ ಮಾತುಗಳಿವೆ. ಬ್ರಿಟನ್ ಭಾರತದಲ್ಲಿ ಮಾಡಲಿರುವ ಹೂಡಿಕೆಗಳ ಮೇಲಿನ ಕಾನೂನು ದೃಷ್ಟಿಕೋನ ಇನ್ನೂ ಅಂತಿಮ ಗೊಂಡಿಲ್ಲ; ಜನರಿಕ್ ಆದ ಔಷಧಿಗಳಿಗೆ ಬಲುದೊಡ್ಡ ಮಾರುಕಟ್ಟೆ ಆಗಿರುವ ಭಾರತದಲ್ಲಿ ಜೀವ ವಿಜ್ಞಾನಕ್ಕೆ ಸಂಬಂಧಿಸಿದ ಬೌದ್ಧಿಕ ಆಸ್ತಿಗಳ ಕುರಿತಾದ ರಕ್ಷಣೆ ಸಾಕಷ್ಟಿಲ್ಲ; ಡೇಟಾಗಳ ಸಂರಕ್ಷಣೆ ಕಾಯ್ದೆ ಇನ್ನೂ ಪೂರ್ಣ ಪ್ರಮಾಣದಲ್ಲಿ ನಿಯಮಗಳ ಸಹಿತ ಅನುಷ್ಠಾನಕ್ಕೆ ಬಂದಿಲ್ಲ... ಎಂಬುದೆಲ್ಲ ಇಂಗ್ಲೆಂಡ್‌ನ ಚಿಂತೆಗಳಾದರೆ, ಭಾರತದ ಉದ್ಯಮಗಳಿಗೆ ತಾವು ರಫ್ತು ಮಾಡುವ ಸರಕುಗಳಿಗೆ ಇಂಗ್ಲೆಂಡ್‌ನಲ್ಲಿ ಇಂಗಾಲ ಹೊರ ಸೂಸುವಿಕೆಗೆ ದಂಡತೆರಿಗೆ ಕಟ್ಟಬೇಕಾಗಬಹುದು ಎಂಬ ಆತಂಕ ಇದೆ. ಇಂಗ್ಲೆಂಡ್‌ನ ಕಾರ್ಬನ್ ಬಾರ್ಡರ್ ಅಡ್ಜಸ್ಟ್ ಮೆಂಟ್ ಮೆಕ್ಯಾನಿಸಂ (ಸಿಬಿಎಎಂ) ಪರಿಸರಕ್ಕೆ ಇಂಗಾಲ ಹೊರಸೂಸುವ ಉದ್ಯಮಗಳಿರುವ ದೇಶಗಳಿಂದ ಆಮದು ಮಾಡಿಕೊಂಡ ಸರಕುಗಳಿಗೆ ದಂಡನಾತೆರಿಗೆ ವಿಧಿಸುವ ನೀತಿ ಹೊಂದಿದೆ.

ಹಾಗಿದ್ದರೆ ಲಾಭ ಯಾರಿಗೆ?

ಭಾರತ ಇಂಗ್ಲೆಂಡ್ ನಡುವಿನ ಎಫ್‌ಟಿಎಯು ಬೆಟ್ಟ ಅಗೆದು, ‘ಮೌಸ್ ಹಿಡಿಯುವ’ ಐಟಿ ಉದ್ಯಮದ ಹಿತಾಸಕ್ತಿಗಳಿಗೆ ಟೇಲರ್‌ಮೇಡ್ ಅನ್ನಿಸುತ್ತಿದೆ. ಎಫ್‌ಟಿಎ ಮಾತುಕತೆಗಳು ಬಹುತೇಕ ಅಂತಿಮ ಹಂತಕ್ಕೆ ತಲುಪುವಾಗ, ಅಲ್ಲಿನ ಪ್ರಧಾನಿ ಆಗಿದ್ದವರು ಭಾರತದ ಅಳಿಯ ರಿಷಿ ಸುನಕ್ ಎಂಬುದನ್ನು ನೆನಪಿಸಿಕೊಂಡರೆ, ಚಿತ್ರ ಸರಳವಾಗಿ ಅರ್ಥ ಆದೀತು. ಭಾರತದ ಐಟಿ ಕಂಪೆನಿಗಳು ಸೇವೆಯ ಹೆಸರಿನಲ್ಲಿ ಬಾಡಿ ಶಾಪಿಂಗ್ ಮಾಡುವುದೇ ಹೆಚ್ಚು. ಅವರು ಇಂಗ್ಲೆಂಡ್‌ನಲ್ಲಿ ತಮ್ಮ ಸಿಬ್ಬಂದಿಯನ್ನು ಮೂರು ವರ್ಷಕ್ಕೊಮ್ಮೆ ಬದಲಾಯಿಸುತ್ತಿದ್ದರೆ, ಶಾಶ್ವತವಾಗಿ ರಾಷ್ಟ್ರೀಯ ಭದ್ರತಾ ತೆರಿಗೆ ತಪ್ಪಿಸಿಕೊಳ್ಳಬಹುದು! ಜೊತೆಗೆ, ಸುನಕ್ ಅವರ ಮಾವ, ಭಾರತದ ಮಧ್ಯಮ ವರ್ಗದ ಕುರಿತಾಗಿ ಇಟ್ಟಿದ್ದ ಬೇಡಿಕೆಗಳು ಎಫ್‌ಟಿಎನಲ್ಲಿ ಅವರಿಗೆ ಪೂರಕವಾಗಿ ಕಾಣಿಸಿಕೊಂಡಿವೆ (ಈ ಬಗ್ಗೆ ವಿವರಗಳಿಗೆ ನವೆಂಬರ್ 18, 2023ರ ಪಿಟ್ಕಾಯಣ ನೋಡಿ.) ಭಾರತದ ಸರಕುಗಳ ರಫ್ತು ಈ ಒಪ್ಪಂದದಿಂದ ಎಷ್ಟು ಏಳುಗತಿ ಕಾಣಬಹುದು ಎಂಬುದನ್ನು ಸಮಯವೇ ಹೇಳಬೇಕು.