ಖಾಸಗಿ ಶಾಲೆಗೆ ಸೆಡ್ಡು ಹೊಡೆಯುವ ಮಾಕನಹಳ್ಳಿ ಸರಕಾರಿ ಶಾಲೆ

ಹೊಸಕೋಟೆ: ಈ ಶಾಲೆಯ ಕೊಠಡಿಗಳ ನಾಲ್ಕು ಗೋಡೆಗಳ ಮೇಲೆಲ್ಲ ಲೆಕ್ಕ, ಪ್ರಮೇಯ, ಕೋನಗಳು. ಇವುಗಳೊಂದಿಗೆ ವಿಜ್ಞಾನದ ಪ್ರಯೋಗಗಳು, ಮತ್ತೊಂದು ಕೊಠಡಿಯಲ್ಲಿ ಕನ್ನಡ ಮತ್ತು

ಇಂಗ್ಲಿಷ್ ಭಾಷೆ ಕಲಿಕೆಗೆ ಪೂರಕವಾದ ಲ್ಯಾಬ್ ಸಿದ್ಧಪಡಿಸಲಾಗಿದೆ. ಇದು ಯಾವುದೋ ಖಾಸಗಿ ಶಾಲೆಯ ಕತೆಯಲ್ಲ. ಸರಕಾರಿ ಶಾಲೆಯೊಂದರ ಹೆಗ್ಗಳಿಕೆಯಾಗಿದೆ.

ಹೆಚ್ಚಿನ ಸರಕಾರಿ ಶಾಲೆಗಳಲ್ಲಿ ಅವ್ಯವಸ್ಥೆ, ಶಿಕ್ಷಕರ ಅಶಿಸ್ತಿನ ಪಾಠ, ಶಾಲೆಯ ವಾತಾವರಣವೆಲ್ಲವೂ ಪಾಲಕರನ್ನು ಖಾಸಗಿ ಶಾಲೆಗಳತ್ತ ಮುಖಮಾಡುವಂತೆ ಮಾಡಿವೆ. ಆದರೆ ಇಲ್ಲೊಂದು ಶಾಲೆ ಇವೆಲ್ಲವನ್ನೂ ಅಲ್ಲಗಳೆದು ಖಾಸಗಿ ಶಾಲೆಗೂ ಸೆಡ್ಡು ಹೊಡೆಯುವಂತೆ ಬೆಳೆದಿದೆ. ಬೇರೆಲ್ಲಾ ಸರಕಾರಿ ಶಾಲೆಗಳಿಗೆ ಮಾದರಿಯಾಗಿ ನಿಂತಿರುವ ಈ ಶಾಲೆ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಹೊಸಕೋಟೆ ತಾಲೂಕಿನ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಮಾಕನಹಳ್ಳಿಯಲ್ಲಿದೆ.

ಮೊದಮೊದಲು ಬೇರೆ ಎಲ್ಲ ಸರಕಾರಿ ಶಾಲೆಗಳಂತೆಯೇ ಈ ಶಾಲೆಯಿತ್ತು. ಆದರೆ ಇಂದು ಈ ಶಾಲೆ ತಾಲೂಕಿನ ಮೊದಲ ಸ್ಮಾರ್ಟ್ ಶಾಲೆಯಾಗಿ ಹೊರಹೊಮ್ಮಿದೆ. ಇದು ಸಾಧ್ಯವಾಗಿದ್ದು ಖಾಸಗಿ ಕಂಪೆನಿಯ ಉದ್ಯೋಗಿಯಾದ ಬಾಬು ಪ್ರಕಾಶ್ ಅವರಿಂದ. ಈ ಶಾಲೆಗೆ ಯಾವುದೇ ಮೂಲ ಸೌಕರ್ಯಗಳು ಇರಲಿಲ್ಲವಾದ್ದರಿಂದ ಬಾಬು ಪ್ರಕಾಶ್‌ರವರು ಈ ಶಾಲೆಯನ್ನೇ ತಮ್ಮ ಕನಸಿನ ಶಾಲೆಯನ್ನಾಗಿ ಪರಿವರ್ತಿಸಲು ಮುಂದಾದರು.

ಇಲ್ಲಿ 1ರಿಂದ 7ನೇ ತರಗತಿವರೆಗೆ ಇದ್ದು, 60 ವಿದ್ಯಾರ್ಥಿಗಳು ಕಲಿಯುುತ್ತಿದ್ದಾರೆ. ಆಧುನಿಕ ಸಂವಹನ ಮಾಧ್ಯಮಗಳನ್ನು ಪರಿಣಾಮಕಾರಿಯಾಗಿ ಬಳಸಿಕೊಂಡು ಹೊಸ ತಲೆಮಾರಿನ ಮಕ್ಕಳಿಗೆ ಡಿಜಿಟಲ್ ಕಲಿಕೆ ಹೇಳಿಕೊಡುವುದರ ಜೊತೆಗೆ ಬೌದ್ಧಿಕತೆ ಹೆಚ್ಚಿಸುವ ವಿಭಿನ್ನ ಪ್ರಯೋಗ ತಾಲೂಕಿನ ಮಾಕನಹಳ್ಳಿ ಸರಕಾರಿ ಶಾಲೆಯಲ್ಲಿ ನಡೆಯುತ್ತಿದೆ.

ತಂತ್ರಜ್ಞಾನ ಆಧಾರಿತ ಕಲಿಕೆಯು ಮಕ್ಕಳಿಗೆ ಹೆಚ್ಚು ಖುಷಿ ನೀಡುವುದರ ಜೊತೆಗೆ ಅವರನ್ನು ಪಾಠ ಪ್ರವಚನಗಳತ್ತ ಸೆಳೆಯಲು, ವಿನೋದಮಯವಾಗಿ ಕಲಿಯಲು ಸಹಕಾರಿಯಾಗಿದೆ. ಸರಕಾರಿ ಶಾಲೆಗಳಲ್ಲಿ ಡಿಜಿಟಲ್ ಕಲಿಕೆ ಮುನ್ನೆಲೆಗೆ ಬಂದಿದ್ದು, ಮಕ್ಕಳ ಕಲಿಕಾ ಸಾಮರ್ಥ್ಯವನ್ನು ಹೆಚ್ಚಿಸಲಾಗುತ್ತಿದೆ.

ಶಾಲೆಯ ಅಂಗಳ ಪ್ರವೇಶಿಸಿದರೆ ಹಸಿರು ಪರಿಸರ ಕಣ್ಮನ ಸೆಳೆಯುತ್ತದೆ. ಕೊಠಡಿಯ ಗೋಡೆಗಳು ವಿಜ್ಞಾನದ ಭರಪೂರ ಮಾಹಿತಿಯ ಜೊತೆಗೆ ಕಲೆ, ಚಿತ್ತಾರಗಳಿಂದ ಕಣ್ಮನ ಸೆಳೆಯುತ್ತದೆ. ವರ್ಲಿ ಕಲೆ ಗೋಡೆಯನ್ನು ಅಲಂಕರಿಸಿ ಚೆಂದಗಾಣಿಸಿದೆ. ತರಗತಿ ಕೋಣೆಗಳಲ್ಲಿ ಡಿಜಿಟಲ್ ಬೋರ್ಡ್, ಟೇಬಲ್‌ಗಳ ಮೇಲೆ ಲ್ಯಾಪ್‌ಟಾಪ್, ಟ್ಯಾಬ್ ಸ್ಥಾನ ಪಡೆದಿವೆ. ಇಂಟರ್‌ನೆಟ್ ಬಳಕೆ ಮಕ್ಕಳ ವಿಭಿನ್ನ ಕಲಿಕೆಗೆ ಸಹಕಾರಿಯಾಗಿದೆ

ಪಠ್ಯ ಕಲಿಕೆಯ ನಂತರ ಮಕ್ಕಳು ಡಿಜಿಟಲ್ ಪರದೆಯಲ್ಲಿ ಬೋಧಿಸಿದ ವಿಷಯಗಳನ್ನು 3ಡಿ ತಂತ್ರಜ್ಞಾನದಲ್ಲಿ ವೀಕ್ಷಿಸಬಹುದಾಗಿದೆ. ಕನ್ನಡ ಮತ್ತು ಇಂಗ್ಲಿಷ್‌ನಲ್ಲೂ ಪಾಠ ಆಲಿಸಬಹುದು. ಶಿಕ್ಷಕರ ಜೊತೆ ಚರ್ಚಿಸಿ ಸಂವಾದ ನಡೆಸಬಹುದು. ತರಗತಿಯ ಹೊರಭಾಗದಲ್ಲಿ ಟೆಲಿಸ್ಕೋಪ್ ಅಳವಡಿಸಲಾಗಿದ್ದು ಭೂ ಮಂಡಲ ಹಾಗೂ ನಭೋಮಂಡಲದ ವಿಸ್ಮಯಕಾರಿ ವಿದ್ಯಮಾನಗಳನ್ನು ಮಕ್ಕಳಿಗೆ ಮನದಟ್ಟು ಮಾಡಿಸಲಾಗುತ್ತಿದೆ ಎನ್ನುತ್ತಾರೆ ಮುಖ್ಯೋಪಾಧ್ಯಾಯಿನಿ ಎಸ್.ಎಚ್ ಲೀಲಾ.

ಹೊಸ ತಲೆಮಾರಿನ ಪೋಷಕರು ಡಿಜಿಟಲ್ ಶಿಕ್ಷಣ ಹಾಗೂ ವೈವಿಧ್ಯಮಯ ಆಕರ್ಷಣೆಗೆ ಒಳಗಾಗಿ ಖಾಸಗಿ ಶಾಲೆಗಳಿಗೆ ಮಕ್ಕಳನ್ನು ಸೇರಿಸುತ್ತಿದ್ದಾರೆ. ಅದಕ್ಕೆ ಪೂರಕವಾಗಿ ಸರಕಾರಿ ಶಾಲೆಗಳಲ್ಲೂ ತರಬೇತಿ ಪಡೆದ ಶಿಕ್ಷಕರು ಮಕ್ಕಳ ಕೈಬರಹ, ಕಾಗುಣಿತ ಹಾಗೂ ಗಣಿತದ ಸರಳ ಸೂತ್ರಗಳನ್ನು ವೈವಿಧ್ಯಮಯವಾಗಿ ಕಲಿಸುತ್ತಿದ್ದಾರೆ. ನಲಿಕಲಿ ತರಗತಿಗಳಲ್ಲಿ ಮಕ್ಕಳ ಸರ್ವತೋಮುಖ ಕಲಿಕಾ ಸಾಮರ್ಥ್ಯವನ್ನು ಒರೆಗೆ ಹಚ್ಚಿ ಕಲಿಸಲಾಗುತ್ತದೆ.

ಲಾಂಗ್ವೇಜ್ ಲ್ಯಾಬ್

ಶಾಲೆಯಲ್ಲಿ ಕನ್ನಡ ಹಾಗೂ ಇಂಗ್ಲಿಷ್ ಭಾಷೆಯ ಲ್ಯಾಬ್‌ಗಳಿಗೆ ಪ್ರತ್ಯೇಕ ಕೊಠಡಿಗಳಲ್ಲಿ ಅವಕಾಶ ಕಲ್ಪಿಸಲಾಗಿದೆ. ಕನ್ನಡ ಭಾಷಾ ಲ್ಯಾಬ್‌ನಲ್ಲಿ ಭಾಷಾ ಪ್ರಯೋಗ, ಸಂಧಿ-ಸಮಾಸ, ಕನ್ನಡದ ಕವಿಗಳು, ವರ್ಣ ಮಾಲೆ, ಕೊನೆಯ ಅಕ್ಷರ ಒಂದೇ ಆಗಿದ್ದು, ಅದರ ಮೊದಲಿಗೆ ಬೇರೆ-ಬೇರೆ ಅಕ್ಷರಗಳನ್ನು ಸೇರಿಸಿ ಆಹಾರ ಪದಾರ್ಥ, ಪ್ರಾಣಿ-ಪಕ್ಷಿಗಳ ಹೆಸರು ಬರುವಂತೆ ಚಾರ್ಟ್ ತಯಾರು ಮಾಡಲಾಗಿದೆ.

ಇಂಗ್ಲಿಷ್ ಭಾಷಾ ಲ್ಯಾಬ್‌ನಲ್ಲಿ ಕೂಡ ಇದೇ ಮಾದರಿ ಇದೆ. ಇದಲ್ಲದೇ ನಲಿ-ಕಲಿ ಕೊಠಡಿ ಯಲ್ಲಿ ಜೇಡರಬಲೆ ಮಾದರಿಯಲ್ಲಿ ಅಕ್ಷರದ ಚಪ್ಪರವನ್ನು ನಿರ್ಮಾಣ ಮಾಡಲಾಗಿದೆ. ಮಕ್ಕಳು ಇದೇ ಚಪ್ಪರದಡಿಯಲ್ಲಿ ಕುಳಿತು ಖುಷಿಯಿಂದ ಪಾಠ ಕೇಳುತ್ತಾರೆ.

ಟ್ಯಾಬ್ ಮೂಲಕ ಪಾಠ ಕಿಲಿಯುವುದು ಹೆಚ್ಚು ಖುಷಿ ನೀಡುತ್ತಿದೆ. ಪರಿಸರ, ಕ್ರೀಡೆ, ಆಟ, ಪಾಠಗಳ ಜೊತೆಗೆ ವ್ಯಾಯಾಮವನ್ನೂ ಕಲಿಸುತ್ತಾರೆ. ಇದರಿಂದ ಶಾಲೆಗೆ ಬರಲು ಉತ್ಸಾಹ ಮೂಡಿದೆ.

-ಆಕಾಶ್, ವಿದ್ಯಾರ್ಥಿ

ಶಾಲೆಗೆ ಬರಲು ಬಹಳ ಖುಷಿಯಾಗುತ್ತದೆ. ಒಂದು ದಿನ ರಜೆ ಬಂದರೂ ಬೇಸರವಾಗುತ್ತದೆ. ಆಟ-ಪಾಠ, ಪರಿಸರ-ವ್ಯಾಯಾಮ ಎಲ್ಲವೂ ಕೂಡಿರುವುದರಿಂದ ಆಸಕ್ತಿ ಇಮ್ಮಡಿಗೊಂಡಿದೆ.

-ರಮ್ಯಾ, ವಿದ್ಯಾರ್ಥಿನಿ