ಶಾಸಕ ಸ್ಥಾನಕ್ಕೆ ಜನಾರ್ಧನ ರೆಡ್ಡಿ ಅನರ್ಹತೆ ಬೆನ್ನಲ್ಲೇ ಗರಿಗೆದರಿದ ರಾಜಕೀಯ

ಕೊಪ್ಪಳ/ಗಂಗಾವತಿ : ಕೊಪ್ಪಳ ಜಿಲ್ಲೆಯ ಗಂಗಾವತಿ ವಿಧಾನಸಭಾ ಕ್ಷೇತ್ರದ ಶಾಸಕರಾಗಿದ್ದ ಮಾಜಿ ಸಚಿವ ಗಾಲಿ ಜನಾರ್ಧನ ರೆಡ್ಡಿ ಅವರು ಅನರ್ಹತೆಗೊಂಡ ಬೆನ್ನಲ್ಲೇ ಕೊಪ್ಪಳ ಜಿಲ್ಲೆಯಲ್ಲಿ ರಾಜಕೀಯ ಚಟುವಟಿಕೆಗಳು ಹೆಚ್ಚಾಗಿವೆ.

ಆಂಧ್ರ ಪ್ರದೇಶದ ಅನಂತಪುರ ಜಿಲ್ಲೆಯ ರಾಯದುರ್ಗ ತಾಲೂಕಿನ ಓಬಳಾಪುರಂನ ಅಕ್ರಮ ಗಣಿಗಾರಿಕೆ ಪ್ರಕರಣದಲ್ಲಿ ಸಿಬಿಐ ನ್ಯಾಯಾಲಯವು ಜನಾರ್ಧನ ರೆಡ್ಡಿಯವರನ್ನು ದೋಷಿ ಎಂದು ಘೋಷಿಸಿ ಏಳು ವರ್ಷಗಳ ಜೈಲು ಶಿಕ್ಷೆಯನ್ನು ವಿಧಿಸಿದೆ. ಇದಾದ ಬೆನ್ನಲ್ಲೇ ಸ್ಪೀಕರ್ ಯು.ಟಿ.ಖಾದರ್ ಅವರು ಭಾರತ ಸಂವಿಧಾನದ 191(1)(ಇ) ವಿಧಿಯ ನಿಬಂಧನೆಗಳ ಪ್ರಕಾರ ಶಾಸಕ ಜನಾರ್ಧನ ರೆಡ್ಡಿ ಅವರನ್ನು ಶಾಸಕ ಸ್ಥಾನದಿಂದ ವಜಾಗೊಳಿಸಿದ್ದಾರೆ.

ಸದ್ಯ ತೆರವುಗೊಂಡ ಸ್ಥಾನಕ್ಕೆ ಚುನಾವಣೆ ಘೋಷಣೆ ಆಗದಿದ್ದರೂ, ಈ ಕ್ಷೇತ್ರಕ್ಕೆ ಚುನಾವಣೆ ನಡೆದರೆ ಯಾರು ಸ್ಪರ್ಧೆ ಮಾಡಬೇಕು ಎಂದು ರಾಜಕೀಯ ಮುಖಂಡರು ತಮ್ಮ ತಮ್ಮ ಪ್ರಯತ್ನದಲ್ಲಿ ತೊಡಗಿದ್ದಾರೆ. ಇನ್ನೂ ಇಲ್ಲೆ ಹನುಮನ ಜನ್ಮ ಸ್ಥಳವಾದ ಅಂಜನಾದ್ರಿ ಇದ್ದು, ಇದು ಬಿಜೆಪಿ ಮತ್ತು ಸಂಘಪರಿವಾರಕ್ಕೆ ಪ್ರತಿಷ್ಠೆಯ ಕ್ಷೇತ್ರವಾಗಿದೆ.

ಗಂಗಾವತಿ ಕ್ಷೇತ್ರದಲ್ಲಿ ಕಳೆದ ಬಾರಿ ಜನಾರ್ಧನ ರೆಡ್ಡಿ ಅವರು 66,213 ಮತಗಳನ್ನು ಪಡೆದು ಕೊಳ್ಳುವ ಮೂಲಕ ಶೇ.41.42ರಷ್ಟು ಮತ ಪ್ರಮಾಣವನ್ನು ಗಳಿಸಿ ಗೆದಿದ್ದರು. ಕಾಂಗ್ರೇಸ್ ಅಭ್ಯರ್ಥಿ ಇಕ್ಬಾಲ್ ಅನ್ಸಾರಿ ಅವರು 57,947 ಮತಗಳ ಮೂಲಕ ಶೇ.36.35 ರಷ್ಟು ಮತಪ್ರಮಾಣ ಗಳಿಸಿ ಪರಭಾವಗೊಂಡಿದ್ದರು. ಇನ್ನು 2019ರ ಚುನಾವಣೆಯಲ್ಲಿ ಗೆದ್ದಿದ್ದ ಬಿಜೆಪಿಯ ಪರಣ್ಣ ಮುನವಳ್ಳಿಯವರು 2023ರ ಚುನಾವಣೆಯಲ್ಲಿ ಕೇವಲ 29,167 ಶೇ.18.25 ಮತಗಳಿಸಿ ಮೂರನೇ ಸ್ಥಾನಕ್ಕೆ ತೃಪ್ತಿ ಪಟ್ಟಿಕೊಂಡಿದ್ದರು.

ಈ ಕ್ಷೇತ್ರದಲ್ಲಿ ಸಂಘಪರಿವಾರವು ಬಿಜೆಪಿಯ ಪರಣ್ಣ ಮುನವಳ್ಳಿಯನ್ನು ಬಿಟ್ಟು ಜನಾರ್ಧನ ರೆಡ್ಡಿಯವರನ್ನು ಬೆಂಬಲಿಸಿದ್ದರು. ಇದರಿಂದ ರೆಡ್ಡಿ ಇಲ್ಲಿ ಗೆದಿದ್ದರು ಎಂಬ ಮಾತುಗಳು ಜಿಲ್ಲೆಯ ಜನರಿಂದ ಕೇಳಿಬರುತ್ತಿವೆ. ಇನ್ನು ಮಾಜಿ ಸಚಿವ ಇಕ್ಬಾಲ್ ಅನ್ಸಾರಿ ಅವರ ಸೋಲಿಗೆ ಜಿಲ್ಲೆಯ ಕಾಂಗ್ರೇಸ್ ನಾಯಕರೇ ಕಾರಣ. ಅದರಲ್ಲೂ ಕೊಪ್ಪಳದ ಶಾಸಕ ರಾಘವೇಂದ್ರ ಹಿಟ್ನಾಳ್‌ ಅವರ ಕುಟುಂಬವೇ ಕಾರಣ ಎಂದು ಜನರು ಹೇಳುತಿದ್ದಾರೆ. ಗಂಗಾವತಿ ಕಾಂಗ್ರೇಸ್ ಮುಖಂಡ ಹಾಗೂ ಮಾಜಿ ಪರಿಷತ್ ಸದಸ್ಯ ಹೆಚ್. ಶ್ರೀನಾಥ್ ಅವರು ಬಹಿರಂಗವಾಗಿಯೇ ಜನಾರ್ಧನ ರೆಡ್ಡಿಯವರನ್ನು ಬೆಂಬಲಿಸಿದ್ದರು. ಇದರ ಜೊತೆಗೆ ಅನ್ಸಾರಿ ಹಾಗೂ ಅಲ್ಲಿನ ಇತರೆ ಕಾಂಗ್ರೇಸ್ ಮುಖಂಡರಾದ ಶಾಮಿದ್ ಮನಿಯಾರ್ ಮತ್ತು ಶೈಲಜ ಹಿರೇಮಠ ಅವರೊಂದಿಗಿನ ಸಂಭಂದ ಹದಗೆಟ್ಟಿತ್ತು, ಇನ್ನು ಅನ್ಸಾರಿ ಸರಿಯಾದ ಚುನಾವಣಾ ಪ್ರಚಾರವನ್ನು ಮಾಡದೇ ಇರುವುದು ಅವರ ಸೋಲಿಗೆ ಕಾರಣವಾಗಿತ್ತು ಎಂದು ಕ್ಷೇತ್ರದ ಕಾಂಗ್ರೇಸ್ ಕಾರ್ಯಕರ್ತರು ಮತ್ತು ಕ್ಷೇತ್ರದ ಜನರು ಹೇಳುತ್ತಾರೆ.

ಶಾಸಕ ರಾಘವೇಂದ್ರ ಹಿಟ್ನಾಳ್ ಅವರ ಕುಟುಂಬ ನನಗೆ ಚುನಾವಣೆಯಲ್ಲಿ ಮೋಸಮಾಡಿದೆ ಎಂದು ಕಾಂಗ್ರೇಸ್ ಕಾರ್ಯಕರ್ತ ಸಭೆಯಲ್ಲಿ ಜಿಲ್ಲಾ ಕಾಂಗ್ರೇಸ್ ಅಧ್ಯಕ್ಷ ಮಾಜಿ ಸಚಿವ ಬಯ್ಯಪೂರ ಹಾಗೂ ಮಾಜಿ ಶಾಸಕ ಬಸವರಾಜ ಹಿಟ್ನಾಳ್ ಅವರ ಮುಂದೆಯೇ ಅನ್ಸಾರಿ ಅವರು ಅಸಮಾಧಾನ ವ್ಯಕ್ತಪಡಿಸಿದ್ದರು. ಆದರೂ ನಂತರ ನಡೆದ ಲೋಕಸಭಾ ಚುಣಾವಣೆಯ ಸಂದರ್ಭದಲ್ಲಿ ರಾಘವೇಂದ್ರ ಹಿಟ್ನಾಳ್ ರವರ ಸಹೋದರ ರಾಜಶೇಖರ ಹಿಟ್ನಾಳ ಅವರು ಗೆಲುವು ಸಾಧಿಸುವಲ್ಲಿ ಅನ್ಸಾರಿ ಅವರು ಮುಖ್ಯ ಕಾರಣರಾದರು.

ಈ ಕ್ಷೇತ್ರಕ್ಕೆ ಬಿಜೆಪಿಯಿಂದ ಪರಣ್ಣ ಮುನವಳ್ಳಿ ಅವರು ಬಲವಾದ ಅಕಾಂಕ್ಷಿ ಆಗಿದ್ದು, ಇದರ ಜೊತೆಗೆ ನೆಕ್ಕಂಟಿ ಸೂರಿಬಾಬು ಅವರ ಹೆಸರು ಕೇಳಿಬರುತ್ತಿದೆ. ಇನ್ನೊಂದೆಡೆ ಜನಾರ್ಧನ ರೆಡ್ಡಿ ಅವರ ಪತ್ನಿ ಅರುಣಾ ಲಕ್ಷ್ಮಿ ಅವರು ಚುಣಾವಣೆಗೆ ಸ್ಪರ್ಧಿಸಲಿದ್ದಾರೆ ಎಂಬ ಮಾತಗಳು ಕೇಳಿಬರುತ್ತಿವೆ.

ಕಾಂಗ್ರೇಸ್‌ನಿಂದ ಇಕ್ಬಾಲ್ ಅನ್ಸಾರಿಯವರನ್ನು ಹೊರತುಪಡಿಸಿ, ಹೆಚ್.ಶ್ರೀನಾಥ್, ಮಾಜಿ ಸಂಸದ ಕರಡಿ ಸಂಗಣ್ಣನವರ ಹೆಸರು ಮುಂಚೂಣಿಯಲ್ಲಿದ್ದು, ಈಗ ಮತ್ತೋಂದು ಹೆಸರು ಶಾಸಕ ರಾಘವೇಂದ್ರ ಹಿಟ್ನಾಳ್ ಅವರ ತಂದೆ ಮಾಜಿ ಶಾಸಕ ಬಸವರಾಜ್ ಹಿಟ್ನಾಳ್ ಅವರ ಹೆಸರು ಕೇಳಿಬರುತ್ತಿವೆ. ಒಂದು ವೇಳೆ ಹೀಗಾದರೆ ಇಕ್ಬಾಲ್ ಅನ್ಸಾರಿಯವರ ಸೋಲಿಗೆ ಕಾರಣರಾದ ಶಾಸಕ ರಾಘವೇಂದ್ರ ಹಿಟ್ನಾಳ್‌ರವರ ತಂದೆಯನ್ನು ಸೋಲಿಸುತ್ತೆವೆ ಎಂದು ಅಲ್ಲಿನ ಮುಸ್ಲಿಂ ಮತದಾರರು ಹೇಳುತ್ತಿದ್ದಾರೆ.

ಕೊಪ್ಪಳ ಜಿಲ್ಲಾ ಕಾಂಗ್ರೆಸ್‌ನಲ್ಲಿ ಹೆಚ್ಚುತ್ತಿರುವ ಅಂತರ :

ಕೊಪ್ಪಳ ಜಿಲ್ಲಾ ಕಾಂಗ್ರೆಸ್‌ನಿಂದ ನಿರಂತರವಾಗಿ ಮುಸ್ಲಿಂ ಮುಖಂಡರು ಅಂತರ ಕಾಯ್ದುಕೊಳ್ಳುತ್ತಿದ್ದಾರೆ ಎನ್ನಲಾಗಿದ್ದು, ಮುಸ್ಲಿಂ ಮುಖಂಡರನ್ನು ಚುನಾವಣೆಯ ಸಂದರ್ಭದಲ್ಲಿ ಮಾತ್ರ ಉಪಯೋಗಿಸಿಕೊಂಡು ನಂತರ ಅವರನ್ನು ಗಣನೆಗೆ ತೆಗೆದುಕೊಳ್ಳುವುದ್ದಿಲ್ಲ ಎಂಬ ಅಸಮಾಧಾನ ಎದ್ದು ಕಾಣುತ್ತಿದೆ. ಇಕ್ಬಾಲ್ ಅನ್ಸಾರಿ ಅವರನ್ನು ಗಂಗಾವತಿಯಲ್ಲಿ ಸೋಲಿಸಿದ್ದು, ಶಾಸಕ ರಾಘವೇಂದ್ರ ಹಿಟ್ನಾಳ್ ಅವರು ಗುತ್ತಿಗೆ ಕಾಮಗಾರಿ ನೀಡುವ ಸಂದರ್ಭದಲ್ಲಿ ತಮ್ಮ ಸಮುದಾಯದವರನ್ನು ಮಾತ್ರ ಪರಿಗಣಿಸುತ್ತಾರೆ ಎನ್ನುವ ಅಸಮಾಧಾನದ ಹೊಗೆ ಮುಸ್ಲಿಂ ಮತದಾರರು ಮತ್ತು ಮುಖಂಡರಲ್ಲಿ ಕಾಣುತ್ತಿದೆ.

ಕಳೆದ ಚುನಾವಣೆಯಲ್ಲೆ ಶಾಸಕ ಹಿಟ್ನಾಳ್ ಅವರನ್ನು ಸೋಲಿಸುತ್ತಿದೆವು ನಮಗೆ ಬೇರೆ ಯಾರು ಉತ್ತಮ ಅಭ್ಯರ್ಥಿ ಇಲ್ಲದ ಕಾರಣ ಅವರನ್ನು ಗೆಲ್ಲಿಸಿದ್ದೇವೆ ಎಂದು ಜನರು ಅಕ್ರೋಶದ ಮಾತುಗಳು ಮುಸ್ಲಿಂ ಮತದಾರರಿಂದ ಕೇಳಿ ಬರುತಿದ್ದು, ಇದರ ಕಾವು ಗಂಗಾವತಿಯಲ್ಲಿ ಕಾಣಬಹುದು. ಕೇವಲ ರಾಘವೇಂದ್ರ ಹಿಟ್ನಾಳ್‌ ಅವರಿಗಾಗಿ ಇಡಿ ಜಿಲ್ಲೆಯ ಕಾಂಗ್ರೇಸ್ ನ ಭವಿಷ್ಯ ವನ್ನೇ ಬಲಿಕೊಡಲಾಗುತ್ತಿದೆ. ಹೀಗೆ ಮುಂದುವರೆದರೆ ಗಂಗಾವತಿಯಲ್ಲಿ ಚುಣಾವಣೆ ನಡೆದಾಗ ಕಾಂಗ್ರೇಸ್ ಪಕ್ಷ ಗೆಲ್ಲುವುದು ಕಷ್ಟವಾಗುತ್ತದೆ ಎಂದು ಕಾಂಗ್ರೇಸ್ ಕಾರ್ಯಕರ್ತರ ಅಭಿಪ್ರಾಯವಾಗಿದೆ. ಇದೆಲ್ಲಾದರ ಮಧ್ಯ ಉಪಚುನಾವಣೆ ನಡೆದರೆ ರಾಜಕೀಯ ಪಲ್ಲಟ ಹೆಗಾಗುತ್ತದೆ ಎಂದು ಕಾದು ನೋಡಬೇಕಾಗಿದೆ.