ಹಜ್ 2025: ಸುಡು ಬಿಸಿಲಿನ ‘ಅರಫಾ ಮೈದಾನ’ ದಲ್ಲಿ ಹಜ್ಜಾಜ್‌ಗಳಿಗೆ ತಣ್ಣೀರಿನ ಸಿಂಚನ

ರಿಯಾದ್:‌ 2025ರ ಹಜ್ ಗೆ ತಯಾರಿಗಳು ಭರದಿಂದ ಸಾಗುತ್ತಿದ್ದು, ಹಜ್ಜಾಜ್ ಗಳಿಗೆ ಬೇಕಾದ ಸರ್ವ ಸಿದ್ಧತೆಗಳನ್ನು ಸೌದಿ ಅರೇಬಿಯಾದ ಸರಕಾರವು ಹಜ್ ಸಚಿವಾಲಯದ ಸಹಾಯದಿಂದ ವ್ಯವಸ್ಥಿತವಾಗಿ ಮಾಡುತ್ತಿದೆ.

ದುಲ್ ಹಜ್ಜ್ 9ರಂದು ವಿಶ್ವದ ವಿವಿಧ ಭಾಗಗಳಿಂದ ಬಂದ ಲಕ್ಷಾಂತರ ಮಂದಿ ಸತ್ಯವಿಶ್ವಾಸಿಗಳು ಅರಫಾ ಮೈದಾನದಲ್ಲಿ ಒಂದೇ ದಿನ ಒಟ್ಟುಗೂಡಲಿದ್ದಾರೆ. ʼಲಬ್ಬೈಕಲ್ಲಾಹುಮ್ಮ ಲಬ್ಬೈಕ್ʼ ಎಂಬ ತಕ್ಬೀರ್ ನೊಂದಿಗೆ ಶ್ವೇತ ವಸ್ತ್ರದಾರಿಗಳಾದ ಹಜ್ಜಾಜ್ ಗಳ ಸಂಗಮಕ್ಕೆ ಅರಫಾ ಮೈದಾನವನ್ನು ಹಿಂದೆಂದಿಗಿಂತಲೂ ವ್ಯವಸ್ಥಿತವಾಗಿ ಸಜ್ಜುಗೊಳಿಸಲಾಗುತ್ತಿದೆ.

ಈ ಬಾರಿ ಅರಫಾ ದಿನದಂದು ಸ್ಥಳೀಯ ತಾಪಮಾನ 40 ಡಿಗ್ರಿ ಸೆಲ್ಸಿಯಸ್ ಗಿಂತಲೂ ಹೆಚ್ಚಾಗುವ ಸಾಧ್ಯತೆಯಿದ್ದು, ಈ ನಿಟ್ಟಿನಲ್ಲಿ ಹಜ್ಜಾಜ್ ಗಳ ಆರೋಗ್ಯ ಕಾಪಾಡುವ ಹಿತದೃಷ್ಟಿಯಿಂದ ಸೌದಿ ಸರಕಾರವು ಅನೇಕ ಕ್ರಮಗಳನ್ನು ಕೈಗೊಳ್ಳುತ್ತಿದೆ.

ಇದರ ಮೊದಲ ಭಾಗವಾಗಿ ಅರಫಾ ಮೈದಾನದ ಸುತ್ತಮುತ್ತ ಹಾಗೂ ನಮೀರಾ ಮಸೀದಿಯ ಸುತ್ತಲೂ ಸುಮಾರು 2000ಕ್ಕೂ ಅಧಿಕ ಮರಗಳನ್ನು ನೆಡಲಾಗುತ್ತಿದೆ. ಇವುಗಳಲ್ಲಿ ಹೆಚ್ಚಿನವು ‘ನೀಮ್’ ಮರಗಳಾಗಿವೆ. ಈ ಮರಗಳು ಗಾಳಿಯಲ್ಲಿನ ಅಧಿಕ ಉಷ್ಣಾಂಶವನ್ನು ಹೀರಿ ಹವಾಮಾನವನ್ನು ತಂಪಾಗಿ ಸಲು ಸಹಕಾರಿಯಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಸುಡಾನ್ ಅಧ್ಯಕ್ಷ ನ್ಯೂಮೆರಿ ಅವರು ಮೌಂಟ್ ಅರಫತ್‌ನಲ್ಲಿ ನೆಡಲು ಈ ನೀಮ್ ಮರಗಳನ್ನು ಒದಗಿಸಿದ್ದರು. ಸುಡು ಬಿಸಿಲಿನ ಅರಫಾ ಮರುಭೂಮಿಯಲ್ಲಿ ಹಜ್ಜಾಜ್ ಗಳ ದಣಿದ ದೇಹಕ್ಕೆ ನೆರಳಿನ ಆಶ್ರಯವನ್ನು ನೀಮ್ ಮರಗಳು ನೀಡಲಿದೆ. ಪ್ರಪ್ರಥಮ ಭಾರಿಗೆ ‘ಸೌದಿ ವಿಷನ್ 2030’ ಭಾಗವಾಗಿ ಈ ಪ್ರಯೋಗವನ್ನು ಮಾಡಲಾಗಿದೆ. ಈ ಪ್ರಯೋಗವು ಯಶಸ್ವಿಯಾದಲ್ಲಿ ಮುಂದೆ ಇನ್ನಷ್ಟು ಮರಗಳನ್ನು ನೆಟ್ಟು ಅರಫಾ ಮೈದಾನವನ್ನು ಹಸಿರಾಗಿಸುವ ಉದ್ದೇಶವೂ ಹಜ್ ಸಚಿವಾಲಯವು ಹೊಂದಿದೆ.

ಇದಲ್ಲದೆ ಸುಮಾರು 300ಕ್ಕೂ ಹೆಚ್ಚು ದೊಡ್ಡ ಛತ್ರಿಗಳನ್ನು ಮೌಂಟ್ ಅರಫಾತ್ ಸುತ್ತಮುತ್ತ ಸ್ಥಾಪಿಸಲಾಗಿದೆ. 350 ಕ್ಕಿಂತಲೂ ಅಧಿಕ ನೀರನ್ನು ಸ್ಪ್ರೇ ಮಾಡುವ ಯಂತ್ರಗಳನ್ನು ಸ್ಥಾಪಿಸಲಾಗಿದೆ. ಹಜ್ ಕರ್ಮಗಳ ನಡುವೆ ಹಜ್ಜಾಜ್ ಗಳಿಗೆ ಹೆಚ್ಚುವರಿ ನೆರಳು ಮತ್ತು ತಂಪಾದ ವಾತಾವರಣವನ್ನು ಈ ವ್ಯವಸ್ಥೆಗಳು ಒದಗಿಸಲಿದೆ.

ಪರಿಸರ ಪರಿಸ್ಥಿತಿಗಳನ್ನು ಸುಧಾರಿಸಲು ಮತ್ತು ಯಾತ್ರಿಕರಿಗೆ ಹಸಿರು, ಹೆಚ್ಚು ಆರಾಮದಾಯಕ ವಾತಾವರಣವನ್ನು ಸೃಷ್ಟಿಸಲು ಅರಫತ್ ಅನ್ನು ಒಳಗೊಂಡಿರುವ ಅಲ್ ಮಶೈರ್‌ನಲ್ಲಿ ಸಸ್ಯವರ್ಗವನ್ನು ಹೆಚ್ಚಿಸಿ ಪರಿಸರವನ್ನು ಹಸಿರಾಗಿಸಲು ಸೌದಿ ಸರ್ಕಾರ ಸಕ್ರಿಯವಾಗಿ ತೊಡಗಿಸಿಕೊಂಡಿದೆ. ಅರಫತ್ ಅನ್ನು ಒಳಗೊಂಡಿರುವ ಅಲ್ ಮಶೈರ್ ಪ್ರದೇಶವು ಮಣ್ಣಿನ ಇಂಗಾಲವನ್ನು ಹೆಚ್ಚಿಸಲು, ಅನಿಲ ಸಾಂದ್ರತೆಯನ್ನು ಕಡಿಮೆ ಮಾಡಲು ಮತ್ತು ಮಣ್ಣಿನ ಗುಣಮಟ್ಟವನ್ನು ಸುಧಾರಿಸಲು ಮರ ನೆಡುವ ಕಾರ್ಯಕ್ರಮಕ್ಕೆ ಚಾಲನೆ ನೀಡಲಾಗಿದೆ.

ಒಟ್ಟಿನಲ್ಲಿ ಹೇಳುವುದಾದರೆ ವಿಶ್ವದ ನಾನಾ ಭಾಗಗಳಿಂದ ಬರುವ ಹಜ್ಜಾಜ್ ಗಳನ್ನು ತಮ್ಮ ಅತಿಥಿಗಳು ಎಂಬಂತೆ ಸೌದಿ ಸರಕಾರವು ಗೌರವದಿಂದ ನಡೆಸಿಕೊಳ್ಳುತ್ತಿದೆ. ಹಜ್ಜಾಜ್ ಗಳ ಆರೋಗ್ಯದ ಹಿತದೃಷ್ಟಿ ಯಿಂದ ಅನೇಕ ಮೊಬೈಲ್ ಆಸ್ಪತ್ರೆಗಳು, ಆಂಬುಲೆನ್ಸ್, ವೈದ್ಯರನ್ನು ಹಾಗು ಆರೋಗ್ಯ ಮೇಲ್ವಿಚಾರಕ ರನ್ನು ಅಲ್ಲಲ್ಲಿ ಸಜ್ಜುಗೊಳಿಸಿದೆ. ಹಜ್ಜಾಜ್ ಗಳಿಗೆ ಮಾರ್ಗದರ್ಶನ ಮಾಡಲು ಸಾವಿರಾರು ಸೌದಿ ಸ್ವಯಂ ಸೇವಕರನ್ನು ನಿಯುಕ್ತಿಗೊಳಿಸಲಾಗಿದೆ. ಹಜ್ ಕರ್ಮದ ಸಮಯದಲ್ಲಿ ಹಜ್ಜಾಜ್ ಗಳಿಗೆ ಯಾವುದೇ ತೊಂದರೆಯಾಗದಂತೆ ನೋಡಿಕೊಳ್ಳಲು ಎಲ್ಲಾ ವಿಧದ ಸೌಕರ್ಯಗಳನ್ನು ಸೌದಿ ಸರಕಾರವು ಕೈಗೊಂಡಿದೆ.

-ಎಸ್.ಎ.ರಹಿಮಾನ್ ಮಿತ್ತೂರು, ಸೌದಿ ಅರೇಬಿಯಾ